Əvvəlcə azadlığımızı aldılar əlimizdən. Dar çərçivələrdə
bir həyat vəd etdilər sağı-solu bəlli olan. Biz dünyaya gəlməmiş çəkilən sərhədləri
bizə bizim sərhədlərimiz kimi sırıdılar. “Sən azadsan” dedilər o sərhədlərin
çox uzağında olanlar və biz dünyaya gəldik sonrasında.
Əvvəlcədən yazılmışdı talelərimiz alınlarımıza,
davranışlarımız qəliblərimizə... Uca ssenaristi Allah olan bir həyatda bu
ssenarini nə qədər yaxşı oynayırsan oyna, bütün savabları və günahları sənin
boynuna yazılacaq dedi uca ssenarist.
Bizə söyüş söyməyi öyrətdilər, amma sonrasında söymə
dedilər; Bizə yalan danışmağı öyrətdilər, yalançı olma dedilər; Bizə gəzməyi
öyrədənlər vurdu ayağımıza ilk qandalları. Vətən anadır dedilər səngərlərin
gerisində gizlənənlər, vətəni parça-parça, içdən-içdən satanlar. Pul əl
çirkidir dedi əlinin çirkini pula bulaşdıranlar. Və budur həyat, çalış bizim
kimi ol dedilər yaşamaq həvəsini iş-ev sistemində unudanlar.
“Qonşu nə deyəcək”, “biabır eləmə bizi el içində”,
“atan bilsə, səni öldürər” həll etdi taleyimizi. Maaşımız ailə quracağımız
qadının gözəlliyi ilə düz mütənasib böyüdü... Bizim buraxdığımız səhvləri
buraxma dedi valideynlərimiz, hər buraxılan səhvin ardınca.
Düşmənimiz var dedilər, onlardan anlatdılar bizə
bir vaxtlar düşmənlə badə toqquşdurmuşlar, qayını onlardan olanlar. Yetmədi
“vur” dedilər, sonra “sus” dedilər, sonra təkrar “vur”dedilər... Silahları
yandırın da deməyi unutmadılar musiqilərdə bizə Xocalını anladanlar.
Qonaqpərvərliyi sevdirdi bizə torpağı qarış-qarış
qonşu dövlətlərə paylayan əskilərimiz. Tarixi anlatdı bizə dünənində rüşvəti
olan müəllimlərimiz. Yaşamağın dəyərini anlatdı bizə əliqanlı həkimlər. Hüququn
“qiymətini” oxudu hakimlər, polislər...
Və həyat dedi bunun adına biriləri. Kreslosunda əyləşmiş
buxovlu dayılardan, skamekada gecələmiş içki bağımlısına kimi, həbsdə azadlıq
istəyəndən azadlıq istədiyi üçün həbsə düşəninə kimi... Yatmağı öyrətdilər əvvəlcə
şifahi ədəbiyyatları ilə, sonra yatmağın faydalarından yazdı yazarlar, dərc
etdi mətbuat.
Müsəlmansan dedi Allah, gündə 5 dəfə səcdəyə getməlisən...
Müsəlmansan dedi Allah, gündə 3 dəfə səcdəyə getməlisən. Müsəlmansan dedi Allah, sən sünni, mən şiəyəm
dedi insanlar. Müsəlmansan dedi Allah, xristiansan demişdi bir zamanlar...
Seymur ORUC`u
Hiç yorum yok:
Yorum Gönder