Yenə qəza! Yenə SOCAR! Yenə istismar müddəti ötmüş
qurğular!
Mən yüksəkmərtəbəli binaları, ümumiyyətlə, şəhər
memariyyəsini sevən biriyəm. Açığı demək gərəklidirsə, o köhnə binalardan daha
cazibəli gəlir mənə yeniləri. Məsələn, bəlkə də bir yazar üçün heç də gözəl səslənməyəcək
bunu deməyim, amma mən İçəri şəhərin binalarından daha çox bəyənirəm Alov qüllələrini.
Trump qülləsi, SOCAR qülləsi, Ağ şəhər və digər bütün yeniliklər məni hər
baxdıqca heyrətləndirir. Lakin bütün bunların batmış neftçilərin meyitləri üzərində
ucaldığını düşündükdə, ağrıyır ürəyimin bir yerləri, şübhə salır binalara olan
sevgilərimə, şübhə salır SOCAR adlı qüdrətlimizin qüdrətinə.
Beynimdə dəli suallar var və hər sualım Ramiz Təkani
kimi soydura bilər dərimi. Üstəlik dərd kürk dərdi də deyil. Bu həssas zamanda
bu həssas hadisədən oxuma qazanırmış kimi də görünməmək dərdi var. Məlum məsələdir
ki, biz Azərbaycan adlı kiçicik bir ölkədə yaşayırıq və bu ölkədə hər hərəkətə
yaraşan bir el məsəli var hərəkət sahibini utandıracaq cinsdən olan.
Amma nə qədər susmağa çalışsam da, vicdanım əl verməyəcək
ən yuxarıdakılardan bu içimi kəmirən sualları soruşmamaq üçün: O qədər pul hara
getdi, bəylər? Hər ilin dekabrını neftçilərin ölüm ayımı etmək lazım? Bu qədər
binalar tikərkən, ya da artıq qalan materiallardan özünüzə bağ evləri ucaldarkən,
yetmədi o fəhlələrin belindən qazandığınız pullarla İsveç banklarında ailələrinizin
adına hesablar açarkən çətin idi bir an üçün o fəhlələrin canlarını əmanət
etdikləri qurğuları yeniləmək? Axı varımızdır! Hər dəfə xarici qonaqlara göstərdiyiniz
o bahalı qurğuları Aztv-niz hər gün-hər gün yayımlayır! Nədir, bəlkə onlar da
sizlərin bağ evlərinizdə quraşdırılıb? Bir an üçün o fəhlələrin əllərinə deyil,
canlarına sığınan ailələrini düşünmək o qədər də çətin olmamalıdır? Bu qədərmi
çətindir anlamaq ki, o fəhlələr yox ikən, siz də yoxsunuz! Hər batırdığınız fəhləyə,
ən azından ailə başçısı kimi baxmağa vicdanınız yetmirsə, əmək kapitalı kimi
baxmağa ac olan gözləriniz yetə bilir?
Tapdınızmı keçən il batırdığınız fəhlələrin nəşini?
Yaxşı bəs, gələn il batıracaqlarınıza kimi tapacaqsınızmı indi
batırdıqlarınızı? Sizin üçün, əlbəttə ki, asandır. Atacaqsınız bir neçə on
minlikləri o bədbəxtlərin ailələrinin qabağına, artıq-əskik danışanları
susduracaqsınız, vakansiya elan edib yeni bədbəxtlər tapacaqsınız. İtirdiyiniz
on minliklər isə, bir gecəyə itirdiyiniz qumar pulunuzdan, bir gecəlik
qadınlarınıza xərclədiyiniz pullarınızdan artıq olmayacaq bəlkə... Ki, o
pulları yenə o bədbəxtlərin iş yoldaşlarının bellərindən çıxarmağın bir yolunu
mütləq tapacaqsınız, axı siz mahirsiniz hesabları ört-basdırda.
Əvvəl-axır haqq-ədalət yerini tapır deyirlər ha...
Ki, görürük ki, haqlıdır bu ifadə. Hər gün birinizin sandıq-sandıq qızıllları
ifşa olunur digəriniz tərəfindən. Mənə bilirsinizmi, nə maraqlıdır? Nə zamana
kimi bacaracaqsınız qana bulaşmış əllərinizi insanlardan gizlətməyi? Nə zaman o
bağ evləriniz başınıza uçurdulacaq? Nə zaman hər yerə basdırdığınız heykəlləriniz
dirilib sizin özünüzü daşa döndərəcək?
Xülasə, suallar çoxdu əslində, amma yaxşı ki,
susuram... və yaxşı ki, susuruq – susuruq xalq olaraq!
Seymur ORUC
Hiç yorum yok:
Yorum Gönder