“Dünyanın mövcud düzəninin varoluşunu sürdürməsi
üçün mütləqdir ki, yeraltı təşkilatları olmuş olsun. Bu təşkilatlar dünyanın
inkişaf istiqamətini bəlirləyir, onun siyasətini və iqtisadiyyatını tənzimləyir.
Ayrı-ayrı dövlətlərin deyil, əsas olan şey onların maraqlarıdır. Onların istəklərindən
kənarda mövcud olan istənilən düzən, ideologiya məhvə məhkumdur” – kimi şeyləri
bir anlıq kənara qoyun! Məsələyə bir də əks istiqamətdən baxın!
Əlbəttə, insan xisləti, məhiyyəti etibarı ilə çox
düşünməyi sevir. Bəzən sadə şeylər ona mənasız, maraqsız gəlir. Məsələn, heçmi
sizdə belə bir şey olmayıb ki, test sualına cavab verərkən, sual sizə asan gəlsin
və qoyulmuş variantlardan biri bu sualı çox sadə şəkildə izah etsin. Bu zaman siz
də “yəni bu qədər asan ola bilərmi cavab” deyə düşünüb o cavabı deyil, yanılaraq
başqa cavabı seçmisiniz? Bax az öncə haqqında stat gətirilmiş o yeraltı təşkilatlar
da eyni insan zəkasının məhsuludur.
İnsan mahiyyəti etibarı ilə yüz illərdir eyni yerdə
addımlayır və həqiqət gərəkdirsə, nə qədər zamanələr biri-birini əvəz etsə də,
bəşər övladı bir arpa boyu məsafə belə qət etməmişdir. Əlbəttə, deyəcəksiniz
ki, bəs kosmik peyklər, yeraltı tədqiqatlar, nüvə reaktorları, lap elə olsun
nüvə bombaları – bunlar nədir? Əslində burada söhbətin konkret inkişafdan
deyil, insanın mahiyyətindən getdiyini anlayan o kəslər, artıq onu da anladılar
ki, bütün bu “inkişaf” adlandırdığımız geyinilmiş qiyafə eyni xislətin məhsullarıdır.
Sonuncu fikri anlamayanlar üçün daha ətraflı anlatmaq gərəksə, məsələ
burasındadır ki, insan pulu, bank-maliyyə əməliyyatlarını, forex-i, silahları və
digər hər şeyi yüz illərdir eyni şeyi düşünərək yaradır – bu dünyada sürdürəcəyimiz
40-50-60 ili daha maraqlı necə yaşamaq olar? Daha dəqiq demək gərəksə, əlbəttə,
iphone 4 rahat telefondur, 5 ondan daha rahatdır, 6 –ya söz ola bilməz, 7 isə
tamam başqa aləmdir, yaxşı bəs xoşbəxtdirmi bəşər övladı? İndi sümüklərini
mağaralarda tapdığımız o ulu əcdadlarımızdan arpa boyu qədər daha xoşbəxt
olmağı bacara bilirikmi? Buna görədirmi, bir gün iphone 8, 9, 10 ... çıxacaq?
Demək ki, biz həyatımızı, əslində, rahatlatmırıq, sadəcə mürəkkəbləşdiririk.
Ona görə də dünyanı dövlət başçıları idarə edir
fikri bizim üçün – insanlar üçün çox sadə yanaşmadır. Necə yenə dövlət
başçıları? Bəs izaholunmaz yeraltı sektalar, təşkilatlar, dünyanın hər yerinə
paylanmış illuminati işarələri, Eminem, buynuzlu keçi, bəs onlar?
Biranlıq, bütün düşüncələrinizi, hətta insan xislətinizi
soyunub, düşünməyə çalışın! Məsələyə digər tərəfdən baxdıqda onun necə sadə
mexanizm üzərində qurulduğunu görüb məyus olacağınızı əvvəlcədən xəbər vermək
istərəm.
Məsələ burasındadır: insanlar xoşbəxt olmaq istəyir.
Onlar həm Yaradanına inanan və ya inanmayan insan, həm də vergi ödədiyi dövlətin
vətəndaşıdırlar. Son cümlədən anlaşıldığı üzərə sizlərin vergi ödəməmək kimi
bir lüksünüz yoxdur! Bəs kimlərin var?
Seçkilər
keçirilir, bu zaman seçilmək istəyənlər yüz cürə qiyafə soyunub-geyinir, az
qala yüz illərdir xoşbəxt olmağı bacarmayan insan övladını xoşbəxt edə biləcəyini,
dövlətinin vətəndaşlarını ağ günə çıxara biləcəyini iddia edir. Dövlət çox şəffafdır
və seçicilər öz hökümətini seçirlər, ya da şəffaf deyil və hansısa iradələrə
tabe şəkildə hökümət təyin olunur. Daha sonrasında isə əvvəldə az qala
ölümsüzlüyü vəd edən o kəslər çəkilirlər çox yuxarılara. Vədlər yalan idi,
insanlar aldadıldı. Lakin 5, 10, 15 illiyinə və ya bir ömür boyunca, yetmədi
övladını da hakimiyyətə gətirə bilməsi üçün bu oyun necəsə davam etdirilməlidir,
ya yox? Yalanı, əlbəttə ki, ən yaxşı şəkildə, başqa bir yalan ört-basdır edə
bilər.
“Bağışlayın, biz də istəyirik bir şeylərin düzəlməsini,
amma nə edək ki, hər şey bizim iradəmiz xaricindədir. Bizlər sadəcə kuklalarıq.
Bizlər aysberqin görünən tərəfiyik, yəni qısacası ümidinizi bizdən üzün!” Biz də
insan övladı olduğumuz üçün, ha bir də unutmadan onu da deyim ki, tez
inandığımız üçün “adam düz deyir də, o, neyləsin ki, o da nəticədə bir
kukladır” fikrinə qapılırıq. Axı biz sadəliyi sevmirik!
Doğrudur, Azərbaycan kimi xırda dövlətlər hər halda
müəyyən iradələrə tabedir, ancaq bu iradələr bizim düşündüyümüz qədər ürküdücü,
az qala ilahi iradələr, gözəgörünməz – yeraltı iradələr deyil. Bu iradələrdən
biri lap şimalımızdadır. Biz ora peraşki satmağa gedirik. Bir başqa iradə
okeanın taa o tayındadır. Bir başqa iradə lap cənubumuzdadır – qara çadralar
ölkəsində. Bir başqası qərbimizdədir – qardaşımızdır. Birisi qos-qocaman
Avropadır, birisi müqəddəs torpağın İsraili. Amma bu İsrail o İsrail deyil! Hər halda, biz öz iradəmizlə hərəkət etmiş
olsaydıq, çoxdan Şuşada İdman kompleksi, Kəlbəcərdə bayraq meydanı yüksəltmiş,
Xankəndidə içində həkim tapılmayan nəhəng dioqnostika xəstəxanası fəlan
tikmişdik. Ya da ən azından bu aprel döyüşlərində irəli gedib geri qayıtmamış,
işi çoxdan bitirmişdik.
Amma bizim iradələrimizi təmsil edən o qos-qocaman
dövlətlərin də başçılarını kukla adlandıraraq özünüzü güldürməyin lütfən!
Digər tərəfdən bir də buna baxın ki, görün mason
olduğu iddia olunan o müğənnilər, məsələn elə VEVO-çular, bu qara PR (reklam) nəticəsində
Youtube-da nə qədər izlənilirlər? Odur ki, əslində, bu yazını yazmaqla səhvə
yol verdiyimi, indi anlamışam. İndi mən də onun fərqinə vardım ki, “alan da məmnundur,
satan da məmnundur”, bəs məni nə incidir? Nə hikmətsə mən heç soğan yeməyi də
sevmirəm.
Xülasə, azca da olsa, sizi öz mürəkkəb
dünyalarınızdan ayırdığım üçün üzr istəyərək, bu dəfə də “gələn yazıda görüşənə
kimi” deyir, üstünüzü qalın örtmənizi təmənni edirəm. Qışdır, bir tərəfinizə
soyuq olar, sonra çaşıb siz də mənim kimi düşünməyə başlayarsınız
Seymur ORUC`u
Hiç yorum yok:
Yorum Gönder